„Getur verið að einn alvarlegasti hýsill e.coli orkupakkasýkingar í landinu sé höfundur Reykjavíkurbréfsins og einn skæðasti smitberinn sé Morgunblaðið en mér er sagt að blaðið fari inn á um það bil 12.000 heimili í landinu en fer um hendur mun fleiri.“
Þessari spurningu veltir Þorkell Sigurlaugsson upp á fésbókinni í gær, en hann er fv. framkvæmdastjóri hjá Háskólanum í Reykjavík og formaður velferðarnefndar Sjálfstæðisflokksins. Tilefnið er gagnrýni Morgunblaðsins og ritstjórnargreina þess á forystu Sjálfstæðisflokksins að undanförnu vegna innleiðingar þriðja orkupakkans og sneið sem Guðlaugur Þór Þórðarson utanríkisráðherra fékk í Reykjavíkurbréfi blaðsins um helgina vegna tillögu Íslands varðandi Filippseyjar í Mannréttindarráði Sameinuðu þjóðanna.
Í Reykjavíkurbréfinu sagði að Guðlaugur Þór hafi með framgöngu sinni „slegið skjaldborg um vopnaða dópsala og grúppur af svipuðu tagi“ og „íslenska utanríkisráðuneytið hafi þannig afvopnað löggæslumenn sem eru að abbast upp á dópsala með kalasnikoffa á Filippseyjum.“
Þorkell segir að Morgunblaðið hafi sett mjög niður að undanförnu:
„Svo kemur að Reykjavíkurbréfinu og þar á maður oft ekki von á góðu. Ekkert óvænt þar til að byrja með, en lesturinn fyllti mann meiri depurð og hneykslan en nokkru sinni fyrr. Aldrei sérstök gleði, hamingju og bjartsýni í því bréfi og er að þessu sinni skrifað til að niðurlægja Guðlaugur Þór Þórðarson. Við lesturinn kom upp í hugann það sem Andrew S. Grove f.v. formaður og forstjóri Intel sagði á sínum tíma:
“The person who is the star of previous era is often the last one to adapt to change, the last one to yield to logic of a strategic inflection point and tends to fall harder than most.”
Bætir Þorkell því við, að skrifin geti varla komið frá manni sem er í eðlilegu andlegu jafnvægi. Höfundur Reykjavíkurbréfsins hafi áhyggjur af dalandi laganámi í landinu, en hann ætti frekar að leita sér aðstoðar við skrif sem eru orðin ávanabindandi fíkn og farin að skaða höfundinn eins og svæsnasti e-coli vírus úr ís frá Efstadal II.
Það sem er verra, hann er farinn að skaða fjölda Íslendinga, því eins og forseti Filippseyja, sérstakur aðdáandi höfundar Reykjavíkurbréfsins sagði; „,þá borða Íslendingar bara ís“! Ég þvoði mér um hendurnar eftir að lesa Morgunblaðið að þessu sinni. Þetta Reykjavíkurbréf er mikil hrákasmíð. Ég sé mikið eftir þeim trjágróðri sem felldur hefur verið til að prenta það í 12.000 eintökum svo ég vitna til sambærilegrar gagnrýni Davíðs Oddssonar á endurreisnarskýrslu Flokksins sem Vilhjálmur Egilsson, veitti forstöðu árið 2009,“ bætir hann við.
Margir taka undir færslu Þorkels á fésbókinni, eða líka við hana. Þeirra á meðal er Guðlaugur Þór Þórðarson utanríkisráðherra.
