Á stöðufundi samhæfingarstöðvar almannavarna í morgun kom fram að í gær voru fjögur tilfelli af COVID-19 sjúkdómum greind á sýkla- og veirufræðideild Landspítala. Einnig kom upp eitt vafasýni.
Þetta kemur fram í tilkynningu frá Almannavörnum.
Allir einstaklingarnir eru á aldrinum 44-67 ára. Enginn er alvarlega veikur.
Öll tengjast skíðasvæðunum á Ítalíu (Trentino) og Austurríki (Ischgl).
Nú hafa því samtals 37 einstaklingar greinst hér á landi með Kórónaveiruna á einni viku, en fyrsta staðfesta tilfellið kom upp í hádeginu sl. föstudag.
Tæplega 400 einstaklingar eru í sóttkví. Samtals 368 sýni hafa verið greind vegna COVID-19 á sýkla- og veirufræðideild Landspítala.
Sóttvarnalæknir og Almannavarnir hafa boðað til reglulegs upplýsingafundar vegna Kórónaveirunnar kl. 14 í dag.
