Fjölþáttaógnir: Ólíkar aðferðir til að grafa undan trausti á stjórnvöld

Katrín Jakobsdóttir forsætisráðherra.

Þjóðaröryggisráð stendur fyrir ráðstefnu um fjölþáttaógnir fimmtudaginn 27. febrúar. Yfirskrift ráðstefnunnar er „Samtal um þjóðaröryggi: Fjölþáttaógnir.“

Þetta kemur fram á vef forsætisráðuneytisins, en forsætisráðherra er formaður Þjóðaröryggisráðs. Á ráðstefnunni verður fjallað um fjölþáttaógnir í víðum skilningi, þ.e. skipulagða beitingu ólíkra aðferða sem miða að því að grafa undan stöðugleika eða trausti á stjórnvöld og stjórnskipan ríkja.  Fjöldi erlendra og innlendra sérfræðinga tekur þátt í ráðstefnunni.

Meðal fyrirlesara eru James Dipple-Johnstone, framkvæmdastjóri aðgerðasviðs hjá bresku persónuverndarstofnuninni, Antonio Missiroli, aðstoðarframkvæmdastjóri málefnasviðs Atlantshafsbandalagsins um nýjar áskoranir í öryggismálum og Clare Melford, einn af stofnendum Global Disinformation Index.

Ráðstefnan sem verður haldin í Hátíðarsal Háskóla Íslands hefst kl. 13:00 með ávarpi Katrínar Jakobsdóttur, forsætisráðherra og formanns þjóðaröryggisráðs og stendur til kl. 17:00.

Ráðstefnan fer fram á ensku og er öllum opin.

Þjóðaröryggisráð skipuleggur ráðstefnuna í samstarfi við Alþjóðamálastofnun Háskóla Íslands. Aðrir samstarfsaðilar eru Verkfræðingafélag Íslands, Blaðamannafélag Íslands, Fjölmiðlanefnd, Kvikmyndamiðstöð Íslands, Varðberg, utanríkisráðuneytið, samgöngu- og sveitarstjórnarráðuneytið, dómsmálaráðuneytið, mennta- og menningarmálaráðuneytið, Persónuvernd, Póst og fjarskiptastofnun, ríkislögreglustjóri og nefnd framkvæmdastjóra stjórnmálaflokkanna um samningu heildarlaga um starfsemi stjórnmálasamtaka.

Dagskrá ráðstefnunnar á ensku.