Í framhaldi af áliti Persónuverndar í máli 2018/1507, dags. 29.11.2018, um gagnagrunn með persónuupplýsingum, hefur ríkisskattstjóri tekið til skoðunar alla framkvæmd við framlagningu og birtingu upplýsinga úr álagningarskrá.
Þetta kemur fram á vefsíðu Ríkisskattstjóra. Könnun þessi stendur yfir og er enn ekki lokið. Ljóst er þó að ríkisskattstjóri mun ekki senda fjölmiðlum upplýsingar um hæstu greiðendur, þar sem slík birting er ekki talin samræmast þeim ákvæðum sem gilda um persónuvernd og friðhelgi einkalífs.
Auglýsing um að álagningu sé lokið á einstaklinga verður birt þann 31. maí n.k. og álagningar- og innheimtuseðlar einstaklinga gerðir aðgengilegir á vef ríkisskattstjóra þann dag. Aftur á móti mun álagningarskrá ekki verða lögð fram fyrr en dagana 19. ágúst til 2. september n.k. eða 15 dögum fyrir lok kærufrests sem er 2. september 2019, sbr. 1. mgr. 98. laga nr. 90/2003, um tekjuskatt.
Óhætt er að segja að það sé gamalt baráttumál hægri manna og annarra áhugamanna um persónufrelsi og -vernd, að takmarka birtingu upplýsinga úr skattskrám landsmanna.
Ingvar Smári Birgisson, formaður Sambands ungra sjálfstæðismanna, fagnar tíðindunum, á fésbókinni og segir:
„Virkilega góðar fréttir. Jafnvel þótt sumir styðji að upplýsingar um skattgreiðslur fólks eigi að vera opinberar þá var þessi framkvæmd skrítin. Ríkisskattstjóra bar auðvitað ekki að útbúa lista yfir „skattakónga“ hvers árs og senda á fjölmiðla. Þessi framkvæmd, sem nú er blessunarlega hætt, endurspeglaði með skýrum hætti þá vanvirðingu sem var borin fyrir fjárhagsupplýsingum fólks.“