„Það er verulega óþægilegt fyrir nágranna hælisleitenda á Ásbrú, sem hafa mátt þola nafnlausar hringingar og hótanir á erlendu tungumáli, að sjá frétt um hælisleitenda á Ásbrú sem tók upp á því að safna geymasýru,“ segir Ásmundur Friðriksson þingmaður Sjálfstæðisflokksins, en sagt var frá því í fréttum í gær, að hælisleitandi í búsetuúrræði Útlendingastofnunar á Ásbrú í Reykjanesbæ hafi í vor staðinn að því að safna sýru úr rafgeymum bifreiða á brúsa.
„Ekki dettur mér það til hugar að fallegur og góður ásetningur liggi þar að baki en kann það þó að vera að ég hafi rangt fyrir mér,“ segir Ásmundur í færslu á fésbókinni, þar sem hann vitnar til nýútkominnar skýrslu greiningardeildar Ríkislögreglustjóra, þar sem fram kom að í hópi hælisleitenda séu einstaklingar sem villt hafa á sér heimildir þegar þeir hafa sótt um landvist. Þeir hafi sagst vera samkynhneigðir og því verið í bráðri hættu í heimalandi sínu en síðar staðnir að því að áreita konur hér á Íslandi.
„Þá hafi þeir þegið félagslega aðstoð en standa sumir hverjir í milljónatuga peningasendingum frá Íslandi til annarra landa. Hvaða þvæla er það? Nú hafa margir stigið fram og bent á hvað sé á seyði. Jafnvel þeir sem sóttu hvað harðast að mér þegar ég varaði við þessari þróun fyrir nokkrum árum sitja nú sömu megin við borðið. Tökum tillit til þess sem lögreglan segir og tökum mark á viðvörunum þeirra og áhyggjum,“ segir Ásmundur Friðriksson.
