Þórhildur Sunna braut siðareglur Alþingis

Þórhildur Sunna Ævarsdóttir, þingflokksformaður Pírata. / Viljinn: Rúnar Gunnarsson.

Forsætisnefnd Alþingis hefur komist að þeirri niðurstöðu að Þórhildur Sunna Ævarsdóttir, þingmaður Pírata, hafi brotið í bága við siðareglur Alþingis með ummælum sínum þess efnis að rökstuddur grunur sé uppi um að Ásmundur Friðriksson, þingmaður Sjálfstæðisflokksins, hafi dregið sér fé með því að rukka akstursgreiðslur frá Alþingi.

Siðanefndin hefur haft til umfjöllunar erindi Ásmundar um meint brot þingmannanna Björns Levís Gunnarssonar og Þórhildar Sunnu Ævarsdóttur á siðareglum fyrir alþingismenn þegar þau tjáðu sig á opinberum vettvangi um endurgreiðslu aksturskostnaðar til hans. Forsætisnefnd hefur lokið meðferð sinni á málinu. Bréf nefndarinnar til Björns LevísÞórhildar Sunnu og Ásmundar, með bókun hennar um niðurstöðu málsins, álit forsætisnefndar og álit ráðgefandi siðanefndar um hin meintu brot eru, auk annarra gagna málsins, birt á vef Alþingis. 

Við meðferð forsætisnefndar á málinu sagði Bryndís Haraldsdóttir varaforseti sig frá málinu vegna ummæla sem hún hafði látið falla á opinberum vettvangi.

Þrír varaforsetar lögðu fram bókanir um afstöðu sína til málsins. Jón Þór Ólafsson, stóð ekki að áliti forsætisnefndar. Bókun hans, ásamt bókunum Þorsteins Sæmundssonar og Guðjóns Brjánssonar, eru einnig aðgengilegar á vef Alþingis ásamt eftirfarandi gögnum málsins: 

1. Bréf ÞSÆ til forsætisnefndar, í tilefni af áliti siðanefndar, dags. 20. maí 2019.
2. Bréf forseta Alþingis til siðanefndar, dags. 2. apríl 2019.
3. Bréf BLG og ÞSÆ til forsætisnefndar, dags. 29. mars 2019
4. Bréf forseta Alþingis til BLG og ÞSÆ, dags. 25. mars 2019.
5. Bréf ÁF til forsætisnefndar, dags. 14. mars 2019.
6. Bréf skrifstofu Alþingis til ÁF, dags. 6. mars 2019.
7. Greinargerð BLG og ÞSÆ í tilefni af erindi ÁF, ásamt fylgiskjölum, dags. 25. febrúar 2019.