Félagsdómur hefur komist að þeirri niðurstöðu að boðun og framkvæmd atkvæðagreiðslu vegna umræddrar verkfallsboðunar hafi verið að í fullu samræmi við lög.
„Frábær niðurstaða sem reyndar kemur mér ekki á óvart,“ sagði Sólveig Anna Jónsdóttir formaður Eflingar.
„Ég er gríðarlega þakklát Karli Ó. Karlssyni lögmanni okkar sem flutti málið af festu en vil líka þakka Magnúsi Norðdahl, formanni kjörstjórnar Eflingar og aðallögfræðingi ASÍ, fyrir að hafa aðstoðað við okkur við að standa rétt að þessari atkvæðagreiðslu frá upphafi. Það er leitt að þurfa að leggja svona mikla orku í að verjast lagaklækjum, en verkalýðshreyfingin á sem betur fer góða að.“
„Það er að mínu mati ekki jákvætt að notast við lagaklæki til að koma í veg fyrir að fólk geti nýtt lýðræðisleg réttindi sín. Niðurstaða dómsins staðfestir þau réttindi. Ég held að allir sem kynntu sér greinargerðir okkar og SA í þessu máli hafi séð það í hendi sér að lítill fótur var fyrir málatilbúnaði SA,“ sagði Viðar Þorsteinsson framkvæmdastjóri Eflingar.
Efling segist í tilkynningu líta á niðurstöðuna sem byr undir báða vængi og hvetur alla félagsmenn og stuðningsmenn til að mæta á dagskrá 8. mars í Gamla bíó, þar sem hótelþernur í verkfalli munu safnast saman.
