Enginn sem fylgist sæmilega vel með umræðum um stjórnmál og viðskipti getur hafa undrast aðsenda grein Bjarna Benediktssonar fjármálaráðherra og formanns Sjálfstæðisflokksins í dag, þar sem hann undirstrikar nauðsyn þess að endurskoða strax forsendur og áform um samgöngusáttmála og borgarlínu, þar sem ljóst sé að áætlanir um kostnað séu fjarri öllum veruleika.
„Áætlaður kostnaður við verkefni samgöngusáttmálans hefur nær tvöfaldast frá því sem gert var ráð fyrir og er nú 300 milljarðar í stað þeirra 160 milljarða sem uppreiknuð kostnaðaráætlun gerir ráð fyrir. Upphafleg áætlun var hins vegar upp á 120 milljarða,“ segir Bjarni í grein sinni.
Hann bendir á að betur og betur sé að koma í ljós, að upphaflegar áætlanir hafi verið stórlega vanmetnar og virðist það eiga við um nær alla þætti sáttmálans. Hljómar það ansi kunnuglega í eyrum þeirra sem fylgst hafa með opinberum framkvæmdum hér á landi í gegnum tíðina, þar sem ætt er af stað á grundvelli óraunhæfra áætlana sem standast svo engan veginn og skattgreiðendur borga brúsann.
Bjarni bendir ennfremur nokkur dæmi um verkþætti sem komnir séu margfalt fram úr upphaflegu mati, t.d. Arnarnesveginn sem gert var ráð fyrir að myndi kosta 2,2 milljarða en samningar nú séu um kostnað upp á 7,2 milljarða, stokkur við Sæbraut hafi átt að kosta 3 milljarða en endi að lágmarki í 27 milljörðum og hafi þannig nífaldast í frumdrögum áður en einni skóflu hefur verið lyft. Sama sé að segja með borgarlínuna, hún sé nú talinn kosta 126 milljarða í framkvæmd en hafi átt að kosta 67 milljarða.
Og ljóst er af orðum fjármálaráðherra að ríkið ætli ekki eitt að borga brúsann. „Augljóst er að upphafleg áform munu ekki ganga eftir og ræða þarf um málið út frá þeirri staðreynd. Við þurfum að forgangsraða verkefnum í samræmi við nýjan veruleika,“ segir Bjarni.
