Bjarni Benediktsson, fjármálaráðherra og formaður Sjálfstæðisflokksins, gerir heiðarlega tilraun til að smala köttum í viðtali við Morgunblaðið í dag þar sem hann reynir að verja hið óvinsæla og umdeilda ríkisstjórnarsamstarf sem Sjálfstæðisflokkurinn á í með Vinstri grænum og Framsóknarflokki.
Fræg eru ummæli Jóhönnu Sigurðardóttur, þáverandi forsætisráðherra og formanns Samfylkingarinnar, að það færi of mikill tími í að smala saman meirihluta á Alþingi, slíkt væri eins og að smala köttum.
Bjarni segir í samtali við Morgunblaðið, að alltaf hafi legið fyrir að það yrði áskorun að halda þriggja flokka stjórnarsamstarfi áfram í langan tíma.
„Ég held að menn hafi nú tekið full djúpt í árinni og sumum líður virðist vera á stundum eins og öll sund séu lokuð en það er að sjálfsögðu ekki þannig. Það breytir því ekki að þinglokin voru viss vonbrigði fyrir okkur í þingflokki Sjálfstæðismanna og ég held að það eigi við um hina stjórnarflokkana reyndar líka.“
Á formanni Sjálfstæðisflokksins er að heyra, að staðan í pólítíkinni eftir kosningarnar 2017 og 2021 hafi ekki boðið upp á aðra kosti en þetta samstarf, þótt það sé á „margan hátt dálítið óvenjulegt.“
Í viðtalinu svarar hann þeim sjálfstæðismönnum sem hafa talað fyrir stjórnarslitum, eða að spilin verði með einhverjum hætti stokkuð upp á nýtt í ríkisstjórnarsamstarfinu:
„Sumir hafa sagt að það eigi bara að kasta þeim aftur á borðið og beðið um að það sé gefið upp á nýtt. Ég er ekki sannfærður um að það sé skynsamlegt. Ég held að það sé til mjög mikils vinnandi að halda stöðugleika í stjórnmálum á Íslandi og gefast ekki upp þó á móti blási.“
Segist hann halda að kjósendur kunni á endanum að meta þrautseigju en auðvitað sé ekki hægt að fórna hverju sem er fyrir stöðugleikann.
„Við vitum hvaða mál það eru sem við viljum helst setja á oddinn. Það þarf að gera átak í grænni orkuöflun. Það er of lítið búið að gerast í að afla nýrrar grænnar orku og í sumum tilvikum eins og við höfum séð núna á síðustu misserum erum við því miður að fara afturábak eins og Hvammsvirkjun er dæmi um. Við verðum að hafa úthald til að ná niður verðbólgunni, það er gríðarlega mikilvægt.
Við þurfum nauðsynlega að koma böndum á kostnað vegna hælisleitenda á Íslandi. Það er algjörlega óréttlætanlegt að það fari meira en milljarður á mánuði í að takast á við þessar umsóknir. Nú er Sjálfstæðisflokkurinn með þetta ráðuneyti og við verðum einfaldlega að halda áfram að koma með tillögur og berjast fyrir því að fá þær samþykktar í þinginu. Möguleikar okkar til þess munu ekki vaxa við það að einhverjir aðrir fari í dómsmálaráðuneytið.“
Og lokaorð hans eru þessi:
„Ef við klessum á vegg, sem við höfum ekki gert ennþá, þá skulum við ræða stöðuna en það er bara ekki komið að því.“
