Ólína Kjerúlf Þorvarðardóttir, fyrrverandi alþingismaður, á hugleiðingu dagsins um hina ótrúlegu stöðu sem komin er upp í Grindvík:
„Nú finnst mér að stjórnvöld þurfi að taka af skarið. Hætta að tala eins og allir vilji snúa aftur til Grindavíkur. Það er ekki svo – við heyrðum það í fréttum kvöldsins – og við getum auðvitað vel skilið hvers vegna.
Svæðið er stórhættulegt. Sprungur opnast fyrirvaralaust og jörðin gleypir fólk. Enginn hiti á húsum, ekkert rafmagn, svo eignir liggja undir skemmdum á næstu sólarhringum. Innviðir í lamasessi. Enginn veit hvenær gýs næst, hvenær næsta skjálftahrina setur allt úr skorðum.
Ég er hrædd um að nú sé tímabært – eftir allt sem á undan er gengið – að leysa bæjarbúa úr prísund óvissu og óöryggis, þá sem það kjósa. Hætta að tala um framtíðarbyggð í Grindavík eins og hún sé sjálfgefið markmið. Það er ekkert sjálfgefið eins og staðan er. Eldormurinn sem hlykkjast í iðrum jarðar undir Reykjanesi hefur rumskað og það getur tekið hundrað ár fyrir hann að sofna aftur.
Nú þarf að kaupa viðlagasjóðshús og festa kaup á íbúðum. Gefa þeim sem það kjósa (líklega drjúgum meirihluta Grindvíkinga) kost á því að byrja upp á nýtt utan Grindavíkur.
Þung verða sporin – en þannig er það.“
