Magnús Már Guðmundsson, varaborgarfulltrúi Samfylkingarinnar, hefur verið ráðinn nýr framkvæmdastjóri BSRB. Magnús hefur verið borgarfulltrúi og varaborgarfulltrúi frá árinu 2014 en mun óska eftir leyfi frá störfum á fundi borgarstjórnar í næstu viku.
Magnús, sem tekur við starfinu af Helgu Jónsdóttur, hóf nýlega meistaranám í opinberri stjórnsýslu, en hann er með B.A. próf í sagnfræði frá HÍ með stjórnmálafræði sem aukagrein, auk kennsluréttinda í grunn- og framhaldsskóla.
Magnús starfaði áður með fötluðum börnum og ungmennum hjá Íþrótta- og tómstundasviði Reykjavíkurborgar með námi á árunum 2002 til 2008. Síðar starfaði hann sem fréttamaður á fréttastofu Vísis.is og Bylgjunnar.
Magnús Már hefur lengi verið virkur innan Samfylkingarinnar, hann varð varaborgarfulltrúi í kosningunum árið 2014, kom svo inn sem borgarfulltrúi um tveggja ára skeið 2016 og hefur verið varaborgarfulltrúi frá kosningunum í fyrra.
„Það eru spennandi tímar hjá BSRB eins og annars staðar í verkalýðshreyfingunni og ég hlakka til að starfa með öflugu fólki innan bandalagsins og í aðildarfélögum þess,“ segir Magnús Már í tilkynningu frá BSRB.
„Barátta verkalýðsfélaga er barátta fyrir bættu samfélagi sem rímar vel við þær hugsjónir sem ég hef beitt mér fyrir á öðrum vettvangi á undanförnum árum,“ segir hann.
