Eins og glöggt mátti greina á lokametrum kosningabaráttunnar, fóru margir á taugum og féllu þar ummæli á samfélagsmiðlum sem mörg hefðu betur verið ósögð. Úrslitin liggja nú hins vegar fyrir, en taugar eru enn þandar og telja margir það benda til að athyglin beinist nú öll og í heilu lagi að hinni óvinsælu ríkisstjórn sem nú situr og forsætisráðherranum Bjarna Benediktssyni.
Hin rómaða kosningamaskína Guðlaugs Þórs Þórðarsonar, sem kennd er við „Gullana“ og Grafarvog, batt trúss sitt við Baldur Þórhallsson stjórnmálafræðiprófessor og fv. varaþingmann Samfylkingarinnar í þessari baráttu. Ekki vill betur til, en að stærstur hluti þess hóps, sem gefið hafði sig upp á stuðning við Baldur, sýnist hafa yfirgefið hann á lokametrunum og kosið taktískt til hægri Höllu Tómasdóttur.
Jón Kristinn Snæhólm, sem lengi hefur verið áhrifamaður í umræddri maskínu og var um skeið aðstoðarmaður Vilhjálms Þ. Vilhjálmssonar borgarstjóra, tekur enga fanga í færslu á samfélagmiðlum, þar sem hann gerir upp úrslitin:
„Um leið og ég óska Höllu Tómasdóttir hjartanlega til hamingju með sigurinn vil ég biðja þá liðhlaupa og gervi sjálfstæðismenn að henda mér af FB[síðu] sinni.
Nú skil ég loksins afhverju XD hangir í 18% einsog pólitískur þurfalingur á Þjóðminjasafninu. Engin væntumþykja gagnvart Sjálfstæðisstefnunni og grunngildum flokksins hjá þessu fólki.
Hannes Hólmsteinn hefur þegar hent mér úr úr sínum vinahópi enda bólusettur fyrir sannleikanum um sjálfan sig.
Við Baldur Þórhallsson og hans fólk vil ég segja.
Við komum, sáum og sigruðum. Manngildi, mannúð og mannréttindi sigruðu því þau voru sett á oddinn.
Mundu Baldur „að vondir hlutir gerast þegar góðir menn aðhafast ekkert.““
Svo mörg voru þau orð. Það eru semsé allir léttir.
