Dagur B. Eggertsson borgarstjóri hefur nú gegnt embættinu samfellt lengur en Davíð Oddsson. Hann kveðst elska Reykjavík, það séu „fágæt forréttindi“ að gegna þessu starfi og borgin sé sannarlega á réttri leið, ólíkt því sem lesa megi úr neikvæðum skrifum Morgunblaðsins um borgarmálefnin.
Borgarstjórnarfundur er í dag og staða borgarinnar erfið í mörgu tilliti. Þá styttist í veru Dags í borgarstjórastólnum, því í vetur tekur Einar Þorsteinsson við af honum. En það kom ekki í veg fyrir að Dagur setti fram hugleiðingu í léttum dúr á fésbókina í dag, þar sem forveri hans kemur við sögu, sem einmitt stýrir Morgunblaðinu nú um stundir:
„Á rölti milli fundarherbergja í ráðhúsinu brá mér við stingandi augnaráð brjóstmyndarinnar af Davíð Oddssyni fyrrverandi borgarstjóra. „Hefur hún alltaf verið svona?“ – hugsaði ég. „Hvað gerði ég nú?“
Þá rifjaðist upp fyrir mér að nú eru líklega nokkrar vikur síðan ég hef verið lengur samfellt í embætti borgarstjóra en þessi ágæti ritstjóri Moggans. Hef ekki orðið var við fréttir af því á síðum blaðsins – þótt áhugi ritstjórans á að telja svona tímabil sé þekktur – en taldi ekki færri en tíu heldur neikvæðar fréttir um borgina í blaði dagsins um okkar góðu borg. Hefur þetta verið að ágerast?
Ég held ég eigi nú bara að gleðjast yfir þessu. Geir Hallgrímsson var lengur í embætti borgarstjóra en það var önnur borg og meira en hálf öld síðan. Ákvað því að sættast við styttuna, sneri við og klappaði henni af vinskap á vinstri öxlina. Það eru fágæt forréttindi að fá að sinna þessu starfi – hvað þá svona lengi – og engin ástæða til að láta neikvæðri eða reiðiskrif yfirskyggja það. Þetta er dásamleg borg hún Reykjavík. Og svo sannarlega á réttri leið.
Takk þið öll sem hafi stutt mig og gert þetta mögulegt – ég elska Reykjavík!“
