Gunnar Smári Egilsson, fjölmiðlamaður og formaður framkvæmdastjórnar Sósíalistaflokksins, bregður sér í líki fundarmanns hjá Vinstri grænum í færslu á fésbókinni og lýsir því sem fyrir eyru og augu ber.
A: „Guð hvað ég er fegin að það var Katrín Jakobsdóttir sem skipaði Ásgeir Jónsson sem Seðlabankastjóra, ég hefði orðið alveg dýrvitlaus ef einhver Sjálfstæðisflokksruddi hefði skipað þennan nýfrjálshyggjugaur.“
B: „Já, segðu. Eða að við séum í ríkisstjórn þegar Trump kemur aftur með bandaríska herinn hingað. Við hefðum örugglega þurft að mála skilti og hanga niðrá Austurvelli ef við værum ekki í ríkisstjórn.“
A: „Já, guð, eða ganga frá Keflavík í bæinn.“
B: „Hahaha, við fáum það alla vega út úr því að vera í ríkisstjórn, losnum við þessa Keflavíkurgöngur.“
C: „Og núna þurfum við ekki að ferðast norður á Strandir til að leggjast fyrir einhverjar jarðýtur. Það er okkar fólk sem stendur fyrir virkjun Hvalár, ekki Sigmundur Davíð eða einhver svoleiðis karlpungur.“
B: „Minnstu ekki á þann skíthæl, ef hann væri í ríkisstjórn væri bandaríski herinn örugglega að koma, Hvalá virkjuð og nýfrjálshyggjan fengi önnur fimm ár í Seðlabankanum.“
A: „Og orkupakkinn, ekki gleyma honum. Ef Sigmundur væri í stjórn væri hann örugglega að þröngva orkupakkanum í gegnum þingið.“
B: „Já, pælið í því, og við örugglega á háa c-inu að mótmæla.“
C: „Það er svo miklu huggulegra að vera í stjórn. Maður þarf ekki að vera neikvæður, getur bara verið hress og kátur.“
B: Já, grillað á kvöldin með Bjarna Ben og strákunum í Sjálfstæðisflokknum.“
A: „Og stelpunum líka, Áslaug Arna kemur með hvítvínið.“
B: „Og dómsmálaráðherrann. Pælið í því, ef við værum ekki í stjórn yrðum við að vera voða reið út í hana út af þessum flóttamannamálum. Það er svo afslappað að vera í stjórn, maður verður svo jákvæður.“
C: „Heldur betur, skál!“
