Forsetakjör á Íslandi er persónubundið og einstakir flokkar fylkja sér því ekki að baki tilteknum frambjóðendum. Athygli vekur að þekktar kosningamaskínur innan Sjálfstæðisflokksins dreifast að minnsta kosti á þrjá mismunandi frambjóðendur og er stór hluti Deigluarms flokksins á bak við Höllu Hrund Logadóttur orkumálastjóra ásamt forsætisráðherrahjónunum fyrrverandi, Geir H. Haarde og Ingu Jónu Þórðardóttur og dætrum þeirra tveim, sem hafa sig mjög í frammi í baráttunni.
Deiglan hefur verið misáberandi hugveita og vefrit á undanförnum árum, en ábyrgðarmaður hennar frá stofnun hefur verið Borgar Þór Einarsson lögfræðingur og fv. aðstoðarmaður Guðlaugs Þórs Þórðarsonar utanríkisráðherra. Hann starfar nú í Brussel. Hann er sonur Ingu Jónu og stjúpsonur Geirs.
Með honum í Deiglunni frá upphafi hefur verið Þórlindur Kjartansson, fyrrverandi aðstoðarmaður Þórdísar Kolbrúnar Reykfjörð Gylfadóttur utanríkisráðherra og fv. formaður SUS og meðeigandi Höllu Hrundar og eiginmanns hennar, Kristjáns Freys Kristjánssonar í sprotafyrirtækinu 50skills, eins og Viðskiptablaðið greindi frá á dögunum.
Sjálf var Halla Hrund pistlahöfundur á Deiglunni ásamt m.a. Helgu Láru Haarde, sálfræðingi og dóttur Geirs og Ingu Jónu, en hún situr nú í kosningastjórn framboðs hennar og er tengiliður þess við landskjörstjórn. Önnur dóttir þeirra Geirs og Ingu Jónu, Hildur María Haarde, hefur einnig verið áberandi í stuðningsteymi Höllu Hrundar.
Sjálf hefur Inga Jóna nú stigið fram sem opinber stuðningsmaður Höllu Hrundar, með aðsendri grein í Skessuhorni, þar sem hún skrifar meðal annars:
„Styrkleikar Höllu Hrundar felast í reynslu hennar og þekkingu, en ekki síst í persónuleika og skapgerð. Ég er sannfærð um að hún mun gegna þeim skyldum sem embætti forseta Íslands krefst með miklum sóma. Hún mun verða traustur fulltrúi þjóðarinnar á alþjóðavettvangi og hún hefur alla burði til að sameina fólk að baki sér, ólíka hópa með ólíka sýn. Hún verður forseti allrar þjóðarinnar.“
