Sex af tólf stærstu sveitarfélögum landsins hyggjast lækka álagningarhlutfall fasteignaskatts á atvinnuhúsnæði, samkvæmt framlögðum frumvörpum til fjárhagsáætlana eins og þau líta út eftir fyrri umræðu í sveitarstjórn. Frá þessu segir á vef Félags atvinnurekenda í dag.
Sjö sveitarfélög hyggjast lækka álagningarhlutfall á íbúðarhúsnæði. Þrátt fyrir lækkanir álagningarhlutfallsins er lítið um að fasteignaskattur lækki í raun eða minna en það 2,5% mark sem Samband íslenskra sveitarfélaga beindi til sveitarfélaganna við gerð kjarasamninga í vor að halda gjaldahækkunum innan við.
Hámarks skattheimtu haldið áfram á meðan aðrir lækka
Sem fyrr vekur athygli, skv. frétt félagsins, algjört aðgerðaleysi Reykjavíkurborgar, þar sem meirihluta skrifstofu- og verslunarhúsnæðis í landinu er að finna. Borgin hefur frá árinu 2016 haldið fasteignaskatti á fyrirtæki í lögbundnu hámarki. Vestmannaeyjabær hækkaði skattinn upp í hámarkið árið 2017 en hyggst nú lækka hann að nýju. Seltjarnarnes hefur ekki hreyft skatthlutfallið en á það er að líta að það er það lægsta í stóru sveitarfélögunum. Fjarðabyggð hefur heldur ekki séð ástæðu til að breyta álagningarhlutfallinu.
Akraneskaupstaður er eina sveitarfélagið sem beinlínis lækkar tekjur sínar af fasteignaskatti á atvinnuhúsnæði á milli ára. Í sumum sveitarfélögum sem lækka skattprósentuna lítið eitt verður hækkun skattbyrði engu að síður drjúg, vegna mikilla hækkana fasteignamats. Í Mosfellsbæ stefnir þannig í tæplega 14% hækkun fasteignaskatta af atvinnuhúsnæði þrátt fyrir breytingu á álagningarprósentu. Í Garðabæ stefnir í 11,7% hækkun ef ekkert verður að gert, en meirihluti bæjarstjórnar hefur boðað að álagningarhlutföll verði endurskoðuð á milli umræðna.
