Svandís Svavarsdóttir matvælaráðherra hefur með banni sínu við hvalveiðum gert atlögu að ríkisstjórnarsamstarfinu sem fyrir vikið stendur veikt eftir, segir Óli Björn Kárason, þingflokksformaður Sjálfstæðismanna, í grein í Morgunblaðinu í dag sem óhætt er að segja að sæti miklum tíðindum.
Formaður þingflokksins segir málið snúist í raun ekki um hvalveiðar, heldur ólögmæta stjórnsýslu ráðherrans og ögrun hennar við samstarfsflokka í ríkisstjórn.
„Ráðherrann hefur kastað blautri tusku í andlit allra þingmanna samstarfsflokka ríkisstjórnarinnar,“ segir hann um það og bætir við að „pólitískur barnaskapur“ sé að halda að slíkt hafi ekki áhrif á samstarfið innan ríkisstjórnarinnar.
„Eitt er að minnsta kosti víst: Traust milli matvælaráðherra og stjórnarþingmanna er lítið og það mun hafa áhrif á samstarf þeirra á komandi mánuðum.“
Í frétt Morgunblaðsins segir ennfremur:
„Mikill þungi er í orðum Óla Björns, sem ber sem þingflokksformaður ábyrgð á því að halda stjórnarliðinu í sínum flokki saman.
Óhugsandi má telja að hann lýsi þessum sjónarmiðum með opinberum hætti án þess að hafa ráðfært sig við Bjarna Benediktsson, formann Sjálfstæðisflokksins.
Þingmenn flokksins sem blaðið ræddi við í gærkvöld, telja stöðuna afar þrönga, Svandís hefði í fljótræði grafið dýpri holu en hún kæmist hjálparlaust upp úr og ekki væri von á rólegu sumarleyfi.“
